Ozêrba…
Pasarinhu biku lumi
Ta fati-fati ian-piu
Ku si djatu limária
Ta txuputi mônti
Rotxa ta pupa.
Ozêrba…
Mo di bentu na fodjada
Kabelu di midju la ta langi-langi
Fúndia prindadu na kumera funku
Frol di baxinha
Ragalidu na odju sumeru.
Ozêrba…Diâ ta dixi di krus
Na totis di kutelu,
Lus ta da kapodi:
Ora bana moskitu,
Di segredu mordedu
Na denti pilon.
Ozêrba…
Sonhu di kurkutada
Ta disprinda di Rotxa-Ponba,
Reia-Grandi na si tunba
Sen krus nen frol
Y si pardueru di fe
Sima kusa ka linpu
Sen kabalu kifari santu kabaleru.
Óndia txikradu
Na boka portu.
Ozêrba…
Lua-xeia na koba kraki,
Furna ta da folgu, kansadu
Ku bran-bran di mar.
Ozêrba…
Kantar di remu,
Rozadi d’osu di piskador,
Siridjadu na kostela boti.
Ozêrba…
Pa bu ka tuntunhi
Ora ki Deus purgunta-bu:
Kusa ma kusa.